منقوووووول (( قصيدة عراقية جميلة جدا )) لا اعرف المؤلف

يامحلا العراق البيه تربينه
#
محلا العراق سهوله وجباله.....وهلاهل ماجداته وضحكة اطفاله
وحكمة كل شيوخه وقوة إرجاله.....وتاريخه المجيد وسطوة إسنينه
يا محلا العراق البيه تربينة



يا محلا العراق ومحلا أيامه.....من جاع وتعرّى وتعبت أعظامه
ويمر بيه العطش بس ماحنى الهامة.....ودسنّة إعلة الحصار وبيه تلاوينة
يا محلا العراق البيه تربينة



يا محلا العراق وطيبة أنهاره.....ينابيع الشمال وطينة أهواره
من دربندخان لهور العمارة.....ملح صار الزمان وبيه تحلّينة
يا محلا العراق البيه تربينة



يا محلا العراق وصاحوا الشيعة.....عراق البيه علي وحسين منبيعه
حُكم حبه علينه ولازم نطيعه.....مثل عباس نخوة وغيرة البينة
يا محلا العراق البيه تربينة



يا محلا العراق تجاوب السنة.....ولعرس العراق بدمنة نتحنّة
أبو صالح الحادي بكل فخر جدنة.....وشباب الأعظمية تعلّگ الزينة
يا محلا العراق البيه تربينة



(تأنينة الشهادة وعز عشگنة الموت) .....منبيع العراق ولو على التابوت
سواتر من جثث بس لا عدونة يفوت.....ومن ظاگ الوكت بسمه تنخينه
يا محلا العراق البيه تربينة



يا محلا العراق الأبد ما بيه عيب.....الذنب ذنب السياسة (ذيب ياكل ذيب)
دعوفوه العراق وخل جروحه تطيب.....وخل ترجع الضحكة لوجه أهالينة
يا محلا العراق البيه تربينة



مو ذنب العراق تهجرت ناسه.....الذنب كل الذنب ذبوه عالساسة
مثل أرضة بوطنّة وتُنخر بساسة.....وباعونة الدول وتشمتوا بينة
يا محلا العراق البيه تربينة



يا محلا العراق وغصبن إعلة الكل.....بلدنة يظل عزيز وبيت أبونة يظل
يالعفت البلد لابد سنة وتمل.....يتبره النخل فد يوم من طينة ؟؟؟!!
يا محلا العراق البيه تربينة



تطيح الروس بس ما طاحت الراية.....ما نقبل تمسّنة بغلطة وحجاية
أهل غيرة وحمية وكلنة حدّاية.....لا نرضى الظلم,لا نرضى بالشينة
يا محلا العراق البيه تربينة



مو كلمن سِكَر وتطوطح بكاسه.....يشتم بالعراق ويشتم بناسه
نكص لسانه والله وهم نكص راسه.....ونّكسّر إيديه ونقتلع عينه
يا محلا العراق البيه تربينة



باوع منتخبنا الفرّح أحبابه.....جاب الكاس إلنّة والنصر جابه
أخذ مني حچاية وخلهة عطابة.....ما يربح ترة كلمن يعادينة
يا محلا العراق البيه تربينة

اخي العزيز لقد ابكيتني
انشاء الله يبقى العراق شامخا ويبقون اهله اهل كرم
((( هذا العراق ابو الغيره )))

مشكور وعاشت ايدك اخي على القصيده الحلوه كلك ذوق
يسلمووو

__________________
الرسام العالمي

منتديات اهل العراق

شكرا لك على الكلمات الراقيه

__________________

__________________

__________________

__________________